त्रिभुवन विमानस्थलमा आन्तरिक र अन्तर्राष्ट्रिय दुवै उडान बन्द
सौर्य एअरलाइन्सको जहाज दुर्घटनाका कारण त्रिभुवन अन्तर्राष्ट्रिय विमानस्थलमा उडान र अवतरण बन्द गरिएको छ।
विमानस्थलबाट आन्तरिक र बाह्य दुवै उडान बन्द छन्। विमानस्थल कार्यालयका अनुसार अवतरणको तयारीमा रहेका अन्तर्राष्ट्रिय विमानलाई आउन दिइएको छैन।
त्रिभुवन अन्तर्राष्ट्रिय विमानस्थलमा आउनुपर्ने विमान बाङ्लादेश, मलेशिया एयरलाइन्स सहितका कतिपय विमान बाटैबाट अन्यत्रै मोडिएका छन्।
दिल्ली जान लागेको भिस्तारा, ब्यांकक जाने क्रममा रहेको नेपाल एअरलाइन्स, दोहा जान लागेको कतार एअरवेज, एअर चाइना, भूटान एअरलाइन्स सहितका विमानको उडान अनिश्चित बन्न पुगेको छ।
कैयौं आन्तरिक विमानको पनि उडान स्थगित भएको छ। त्रिभुवन विमानस्थलमा आउनुपर्ने आन्तरिक जहाजलाई सम्बन्धित विमानस्थलमै रोकिएको छ। उद्धारको काम नसकिएसम्म विमानस्थल बन्द रहने भएको छ।
